Одоогоос есөн оны тэртээх могой жил тухайн онд ажил үйлс, алдар гавьяагаараа монгол түмнээ манлайлсан хүмүүсийг олны танил эрхмүүдийн саналаар тодруулж эхэлснээс хойш ес дэх шалгаруулалттайгаа бид золгож байна. “Өнөөдөр” сонины уламжлалт энэ арга хэмжээ бүхний нүдэнд ил тод, нийгмийн салаа мөчир бүхний санал бодлыг тусгадгаараа шударга, өгөөжтэй хэмээн олон түмэн үнэлдэг билээ. Энэ шалгаруулалтаас тухайн жилд Монголын нийгэм, улс төр, эдийн засаг, урлаг соёл, спорт гээд нийгмийн амьдралын бүхий л салбарт ямархуу онцлог үйл явдал өрнөв, хэн түүнд голлох үүрэгтэй оролцов гэдгийг танин мэдэж болдог бөлгөө. “Харшлалт” хэмээх шороон үхэр жилийн Алдартнуудыг бид уламжлал ёсоор 100 эрхмийн саналаар тодрууллаа. Олны танил хүмүүс энд голлосон бөгөөд эгэл жирийн ажилчин, албан хаагч, малчин, үйлдвэрлэгч, сурагч, оюутны цөөн төлөөлөл багтав. Бид санал асуулгад оролцогч бүрээр гурван хүн нэрлүүлж, нэгдүгээрт нэрлэгдсэн бол 3, хоёрт орсон бол 2, гуравт жагссан бол 1 оноо өгөх журмаар нийлбэр оноог гарган, байр эзлүүлдэг билээ.
Санал асуулгад оролцогчид нийтдээ 69 хүнийг нэрлэжээ. Олноо манлайлж, хийсэн бүтээснээрээ бусдын талархал хүлээсэн тэдгээр хүмүүсийн дотор бүхий л ажил, мэргэжлийнхэн байна. Монголын тэргүүлэх улстөрч, төрийн зүтгэлтэн, урлаг, спортоор Монголоо дэлхийд алдаршуулагчид мэдээж энд бий. Монголын хөдөөд мод ургуулж, буяны дээдийг хурааж яваа эгэл иргэн, уул уурхайн төсөлд оролцогч гадаадын харьяат, галын аюулаас бусдын амийг аварсан долоохон настай хүү, дэлхийн миссийн тэмцээнд үзэсгэлэнт монгол бүсгүйчүүдийг төлөөлөн оролцсон охин, оюун сэтгэхүйн гайхамшигт чадвараараа дэлхийн дэвжээнд тэргүүлсэн залуу, улсын баяр наадамд уясан хөлгөө таван удаа түрүүлүүлсэн уяач гээд сонин содон ажил үйлстэн ч бас багтсан. “Тэргүүн алдартан”-аар Санжаагийн Баяртай уралдсан Цахиагийн Элбэгдорж, “барианд орохынхоо” өмнөхөн түүний урд гишгэв. Өмнөх шалгаруулалтуудад “Тэргүүн алдартан”- ы төлөөх сунгаа ингэж ач тач болж байсангүй. “Есөн алдартан”-ы байр эзэлсэн оноо хоорондоо ойрхон зөрөөтэй байгаа нь ч энэ оны бас нэгэн онцлог мөн. Монгол Улсын Засгийн газрын Шадар сайд М.Энхболд есөн удаагийн шалгаруулалтад завсаргүй ес шалгарч, түүнтэй адил амжилттай явсан Монгол Улсын гурав дахь Ерөнхийлөгч Н.Энхбаяр энэ жил анх удаа “аман хүзүүнд” хурдаллаа. Энэ мэтийн олон сонин хачныг нэрлэж болох боловч эрхэм Уншигч Та өөрөө Алдартны шалгаруу лалтаар аялах нь сонирхолтой биз ээ. Удахгүй бар жил гарна. Монголын түүхийг зузаалах он цагийн хуудас шинээр нээгдэнэ. Тэр хуудас баяр баясгалан, бахархах үйлс, баатар хүмүүс, ололт амжилт, олз ашгаар дүүрэн байх болтугай. Бар жилийн “Алдартан” тодрох өдрийг хамтдаа хүлээе.
Уншигчдын сэтгэгдэл